Вознесение Господне. Тропарь, глас 4.
Возне́слся еси́ во сла́ве, Христе́ Бо́же наш,/ ра́дость сотвори́вый ученико́м/ обетова́нием Свята́го Ду́ха,/ извеще́нным им бы́вшим благослове́нием,/ я́ко Ты еси́ Сын Бо́жий, Изба́витель ми́ра.

Кондак, глас 6.
Éже о нас испо́лнив смотре́ние,/ и я́же на земли́ соедини́в небе́сным,/ возне́слся еси́ во сла́ве, Христе́ Бо́же наш,/ ника́коже отлуча́яся,/ но пребыва́я неотсту́пный,/ и вопия́ лю́бящим Тя:/ Аз есмь с ва́ми и никто́же на вы.

Ап. от 70-ти Андроника. Тропарь, глас 3.
Апо́столи святи́и,/ моли́те Ми́лостиваго Бо́га,/ да прегреше́ний оставле́ние/ пода́ст душа́м на́шим.

Кондак, глас 2.
Звезду́ пресве́тлую,/ Богоразу́мия све́том просве́щшаго язы́ки/ апо́стола Христо́ва Андрони́ка восхва́лим/ и с ним во благове́стии потруди́вшуюся Иуни́ю прему́друю, вопию́ще:/ моли́те Христа́ Бо́га непреста́нно о всех нас.

Великомч. Николая Софийского. Тропарь святаго, глас 3.
Заре́ю Ду́ха обогати́вся, сла́вне,/ и отту́ду восприи́м дерзнове́ние,/ испове́дал еси́ на суди́щи му́жески Тро́ицу Единосу́щную,/ те́мже и ка́мением побива́емь,/ не покори́лся еси́./ Огне́м же сожига́емь,/ обличи́л еси́ пре́лесть безбо́жных,/ многострада́льне свя́те Нико́лае./ Сего́ ра́ди мо́лим тя:/ испроси́ душа́м на́шим/ ве́лию ми́лость.

Кондак, глас 2.
Благоче́стия и́стиннаго побо́рника/ и в беда́х непобеди́маго помо́щника,/ Боже́ственнаго Никола́я в пе́снех восхва́лим:/ сей бо яви́ся в после́дняя ле́та звезда́ пресве́тлая,/ просвеща́ющая ве́рных сердца́,/ и, со Áнгелы ны́не Тро́ице предстоя́,/ непреста́нно мо́лится о всех нас.

Прп. Евфросинии, в миру Евдокии. Тропарь, глас 8.
По земне́м вдовстве́ Небе́сному Жениху́ себе́ уневе́стивши/ и в кня́жестем черто́зе подви́жнически пожи́вши,/ по́слежде и черто́г, и чад твои́х Бо́га ра́ди оста́вила еси́,/ преподо́бная Евфроси́ние,/ и, вше́дши во оби́тель, тобо́ю созда́нную,/ во и́ноческом о́бразе мно́ги по́двиги показа́ла еси́,/ и свято́е житие́ по благода́ти Бо́жией блаже́нною кончи́ною увенча́ла еси́/. И ны́не, предстоя́щи Христу́ Бо́гу,/ моли́ спасти́ся душа́м на́шим.

Кондак, глас 2.
Вся кра́сная ми́ра сего́ я́ко су́етная презре́вши/ и те́ло твое́ посто́м и бде́нием изнури́вши,/ непреста́нными моли́твами Бо́гу угоди́ла еси́,/ преподо́бная Евфроси́ние,/ и, дар исцеле́ний от Него́ прия́ти сподо́бльшися,/ слепо́му прозре́ние/ и мно́гим неду́жным исцеле́ние дарова́ла еси́./ Те́мже ра́достно взыва́ем, глаго́люще:/ сла́ва Бо́гу, прославля́ющему святы́я Своя́.